ނޫރާއްޖެއަކީ މުޖުތަމަޢުއަށާއި، އިޤްތިޞާދާއި އަދި ތިމާވެއްޓަށް ފާގަތި މުސްތަޤްބަލެއް ބިނާކުރުމަށްޓަކައި، ދިވެހި ސަރުކާރާއި ބްލޫ ޕްރޮސްޕެރިޓީ ކޯލިޝަން ގުޅިގެން ކަނޑުފަޅުތަކާއި ކަނޑުފަޅުގެ ވަޞީލަތްތައް ހިމާޔަތްކޮށް ރައްކާތެރިކުރުމަށް ކުރެވޭ މަސައްކަތެކެވެ.

​ދިވެހިރާއްޖެއަކީ މުޅި ދުނިޔޭގެވެސް ކަނޑުފަޅުގެ ދިރުންތަކާއި މުރަކަ ފަރުތަކުގެ ވެށި އެންމެ މުއްސަނދި އެއް ޤައުމެވެ. ފަހަރަކު މަހެއް ބާނައިގެން ޒަމާނުއްސުރެ ދިވެހިން ކުރަމުން އަންނަ ދޮށީގެ މަސްވެރިކަމަކީ، ކަނޑުފަޅުތަކުގެ ވެއްޓަށް ކުރާ އަސަރު ކުޑަ،  ދުނިޔޭގައި އެންމެ ދެމެހެއްޓެނިވި ގޮތެއްގައި ކުރެވޭ ކަނޑުމަހުގެ މަސްވެރިކަމުގެ ތެރޭގައި ހިމެނޭ މަސްވެރިކަމެކެވެ. މާ ކަނޑުގެ ވަޞީލަތްތަކަކީ ދިވެހިންގެ ދިރިއުޅުމާއި އިޤްތިޞާދުގެ ބިންގަލެވެ. އަދި އެންމެ ރަނގަޅު ފެންވަރުގެ ކަނޑުމަހާއި ސީފުޑްގެ ބާވަތްތައް އުފެއްދުމާއި، ދިވެހި ރާއްޖެއަށް ދުނިޔޭގެ އެކި ކަންކޮޅުތަކުން ފަތުރުވެރިން ޒިޔާރަތް ކުރުމުގެ އަސްލެވެ.

އެހެންނަމަވެސް ކަނޑުފަޅުގެ މި މާހައުލީ ނިޒާމުތަކަކީ ނާޒުކު ވަޞީލަތްތަކެކެވެ. ކަނޑުފަޅުގެ ސަރަޙައްދުތަކާއި ގުޅިފައިވާ ތަރައްޤީއާއި، މަސްވެރިކަމަށް ކުރިމަތިވެފައިވާ ގޮންޖެހުންތަކާއި، ތިމާވެއްޓަށް ކުރާ ނޭދެވޭ އަސަރުތަކުގެ ސަބަބުން ފަރުތަކަށާއި މަހުގެ އާބާދީއަށް ވަނީ ނުރައްކާތައް ކުރިމަތިވެފައެވެ. ކަނޑުފަޅުތަަކުގެ ވަޞީލަތްތަކުގެ ދުޅަހެޔޮކަން ބަރޯސާވަނީ ވިސްނުންތެރިކަމާއެކު ކުރެވޭ ޕްލޭންތަކުގެ މައްޗަށެވެ. އެހެންކަމުން ދިވެހި ސަރުކާރުން ދިވެހިރާއްޖޭގެ ކަނޑުފަޅުގެ ސަރަހައްދު  ހިމާޔަތްކުރުމައްޓަކައި މިދަނީ މުހިއްމު ފިޔަވަޅުތަކެއް އަޅަމުންނެވެ. ނޫ ރާއްޖެ ޕްރޮގްރާމްގެ ތެރެއިން ދެމެހެއްޓެނިވި މަސްވެރިކަމާއި، ސްމާޓް އިޤްތިޞާދީ ތަރައްޤީއާއި، އެންމެ ނާޒުކު ދިރުންތަކުގެ ބާވަތްތަކުގެ ވެށި ހިމާޔަތްކޮށް ރައްކާތެރިކުރުމުގެ ވަށާޖެހޭ ޕްލޭންއެއް އެކުލަވައިލުމުގެ މަސައްކަތް ދަނީ ކުރެވެމުންނެވެ. މިއީ، ރައްޔިތުންގެ ބޭނުންތަކަށާއި ތިމާވެއްޓަށްވެސް ކުރިއެރުން މަގުފަހިކޮށްދީ ފާގަތި މުސްތަޤްބަލެއް ފަހިކޮށްދޭނެ ޕްލޭނެކެވެ.